11th Nov 2018 DMC Central Karachi Press Release
کراچی ( ) ضلع وسطی میں استقبالِ جشنِ ولادتِ رسول صلی اللہ و علیہ وآلہِ وسلّم کے سلسلے میں کئے جانے والے انتظامات تکمیل کے مراحل میں ، چئیرمین بلدیہ وسطی ریحان ہاشمی انتظامات کو حتمی شکل دینے کے لئے بلدیہ وسطی کے تمام زونز کے ہنگامی دورے پر۔ تفصیلات کے مطابق بلدیہ وسطی میں ہر سال کی طرح امسال بھی جشنِ ولادتِ رحمت اللعالمین صلی اللہ علیہ وآلہ وسلم دینی عقیدت و احترام کے ساتھ منایا جائے گا۔ بلدیاتی خدمات کی بھرپور ادائیگی کے لئے کئے گئے انتظامات کی نگرانی کے لئے چیئرمین بلدیہ وسطی ریحان ہاشمی تمام زونز کے دورے کررہے ہیں۔ ربیع الاوّل کاچاند نظرآنے سے قبل مختلف مکاتبِ فِکر کے علما سے ملاقات پر طے کئے جانے والے انتظامات اور شکایات کو دور کرنے کے لئے کئے جانے والے انتظامات کے فالو اپ کے لئے ریحان ہاشمی نہ صر ف اپنے افسران اور کارکنان سے خدمات لے رہے ہیں بلکہ بہ نفسِ نفیس نشاندہی کئے جانے والے علاقوں کا دورہ کررہے ہیں تاکہ جلوس و میلادِ محمد مصطفےٰ ﷺ کی تقریبات کے انعقاد کے مراکز پر صفائی اور جراثیم کُش ادویات کا اسپرے کیا جائے ۔ جبکہ تمام مساجد و امام بارگاہوں کے اطراف اور ان کو جانے والے راستوں پر صفائی، چونے کا چھڑکاؤ اور رات کے وقت روشنی کے انتظامات بھی کئے جارہے ہیں۔واضح رہے کہ ربیع الاوّل کا چاند نظر آتے ہیں مسلمانانِ میلادِ النبیﷺ کی تقریبات کا آغاز کردیتے ہیں ۔سو بلدیہ وسطی کے متعلقہ شعبے کے افسران و کارکنان بھی اپنی اپنی ذمہ داریاں پوری کرنے کے لئے تندہی سے مصروفِ عمل ہوگئے۔واضح رہے کہ علمأ سے ملاقات کے دوران ریحان ہاشمی نے ہر مکتبۂ فکر کے مسائل اور ضروریات سے آگاہی حاصل کی اور جشنِ ولادتِ محمد مصطفےٰ ﷺ کی تقریبات اور جلوسوں کے انتظامات میں بھرپور تعاون کا یقین دلایا اور اب اسکی تکمیل کے لئے پوری تندہی سے کوشاں ہیں۔
11th Nov 2018 DMC Central Karachi Press Release
