4th Jan 2017 DMC Central Karachi News & Picture

عام شہری کو اپنا حق معلوم ہو جائے تو مسائل بہت حد تک حل ہوجائیں: حق پرست ارکانِ اسمبلی 

مورخہ : 4؍ جنوری 2017ء ؁

کراچی ( ) ہمارے عوام کا المیہ یہ ہے کہ انہیں اپنے حقوق کا ہی علم نہیں ، جس کی وجہ سے متعدد مسائل جنم لیتے ہیں۔ ان خیال کا اظہار حق پرست ارکانِ اسمبلی نے ضلع وسطی کے ہیڈکوارٹر ناظم آباد نمبر2 میں منعقدہ سیمینار میں کیا جس کااہتمام پاکستان ڈیولیپمنٹ الائینس اور چلڈرن ایڈوکیسی نیٹ ورک نامی این جی او نے ضلع وسطی کے تعاون سے کیا تھا۔ اس موقع پر چیئرمین ریحان ہاشمی نے کہا کہ اسٹریٹ چلڈرن اور غریب عوام کی تعلیم اور بہتری جو جو کام این جی اوز کررہی ہیں وہ قابلِ ستائش ہیں۔اجلاس میں حق پرست ایم این اے شیخ صلاح الدین، ایم پی اے ایڈوکیٹ محفوظ یارکان اور جمال احمد اور این جی اوکے عہدے داران شریک تھے۔اس موقع پر پاکستان ڈیولیپمنٹ الائنس کے نیشنل کو آرڈینیٹر ضیا الرحمن نے کہا کہ ہمارا عزم ہے کہ دکھی انسانیت اور قوم کے نونہالوں کی ترقی کے لئے کوئی دقیقہ فروگزاشت نہیں کیا جائیگا۔ مذکورہ سیمینار میں اس بات پر زور دیا گیا کہ عوام الناس کو انکے حقوق سے آگاہ کرنے کے لئے باقاعدہ تربریتی پروگرامز منعقد کئے جائیں جن میں ہر طبقۂ فکر سے تعلیم یافتہ اور انسانیت سے محت کرنے والے افراد کو شامل کیا جائے۔ 

4th Jan 2017 DMC Central Karachi News & Picture 

3rd Jan 2017 DMC Central Karachi News & Picture Meeting UC Chairman

محدود وسائل اور لامحدود عزم و حوصلے کی داستان 

100 روزہ صفائی مہم کوافسران اور کارکنان کے تعاون سے کامیاب بنائیں گے: ریحان ہاشمی 

محدود وسائل کے باوجود ایک مہینے میں ہزاروں ٹن کچرے کے بیک لاگ کو ٹھکانے لگاناقابلِ تحسین کام ہے 

بلدیہ وسطی کی یوسیز کے شعبہء صحت و صفائی سے تعلق رکھنے والے افسران سے خصوصی اجلاس میں 

خطاب 

مورخہ : 3؍جنوری 2017 ؁ء 

کراچی ( ) چیئرمین بلدیہ وسطی ریحان ہاشمی نے کہا ہے منتخب یو سی چیئرمین و ائس چیئرمین بلدیہ وسطی کے افسران و کارکنان کے ہمراہ باہمی تعاون اور محنت سے 100روزہ صفائی مہم کو کامیابی سے ہمکنار کریں گے اور صفائی کا یہ عمل مسلسل تسلسل کے ساتھ جاری رہے گے۔محدود وسائل کے باوجود ایک مہینے میں ہزاروں ٹن کچرے کے بیک لاگ کو ٹھکانے لگانا قابلِ تحسین عمل ہے۔ یہ بات انہوں نے فوکل پرسن نارتھ ناظم آباد خرم بھائی کے ہمراہ نارتھ ناظم آباد زون کے منتخب یوسی چیئرمین ،وائس چیئرمین یوسی پینل اور بلدیہ وسطی کی نارتھ ناظم آباد زون کی یوسیزکے شعبہء صحت و صفائی،پارک ،M&E سے تعلق رکھنے والے افسران سے ایک خصوصی اجلاس میں کہی ۔ 100روزہ صفائی کی مہم کو ایک مہینہ مکمل ہونے کے بعد بلدیہ وسطی کے عملے کی کارکردگی کا جائزہ لینے اور آئندہ کا لائحہ عمل تیارکرنے کی غرض سے بلائے گئے اجلاس میں ریحان ہاشمی بلدیہ وسطی میں کئے جانے والے صفائی ستھرائی کے انتظامات اور وسائل کی کمی کے باوجود توقع سے زیادہ کوڑاکرکٹ ٹھکانے لگانے پر یوسیز کے چیئرمین، وائس چیرمین اور افسران شعبہء صحت و صفائی کی تعریف کرتے ہوئے کہا کہ نامساعد حالات اور ضرورت سے کم وسائل کے باوجود جس بہتر کارکردگی کا مظاہرہ منتخب بلدیاتی قیادت اور بلدیہ وسطی کے کارکنان نے کیا ہے وہ اس کے لئے خراجِ تحسین کے حقدار ہیں۔ انہوں نے کہاکہ بلدیہ وسطی کی تمام تر کامیابی منتخب بلدایتی نمائندوں اور افسران و کارکنان کے باہمی تعاون اور محنتِ شاقّہ کا نتیجہ ہے۔ 100روزہ صفائی مہم اسی طرح باہمی تعاون کے ساتھ کامیابی سے ہمکنار ہوگی۔ اس موقع پر انہوں نے منتخب یو سی چیئرمین سے خصوصی بات چیت کرتے ہوئے کہا کہ وہ گاربیج کیلکشن کے کام کی نگرانی کریں اور ڈور ٹو ڈور گاربیج کلیکشن کرنے والے ذمہ داران کو پابند کرٰ کہ وہ ڈسٹ بن مہیا کرے اور تمام دوکاندار بھی ڈسٹ بن کے استعمال کو یقینی بنائیں جبکہ عوام کو صفائی ستھرائی کے حوالے سے آگہی دینے کے لئے پمفلٹ اور بینرز بھی آویزاں کریں اس موقع پر یوسی چیئرمینز نے سینی ٹیشن عملے کی کارکردگی پر اپنے اطمینان کا اظہار کیا ۔دریں اثناء 100روزہ صفائی مہم بلدیہ وسطی میں پوری آب و تاب سے جاری ہے ۔چیئرمین بلدیہ وسطی ریحان ہاشمی اور وائس چیئرمین سید شاکر علی کی نگرانی میں مہم کے تینتیسویں روز بھی بلدیہ وسطی کے محکمہء صحت و صفائی کے افسران و کارکنان منتخب بلدایتی نمائندؤں کی نگرانی میں منتخب یوسیز میں تندہی کے ساتھ صفائی کا عمل جاری رکھے ہوئے ہیں۔ریحان ہاشمی محدود وسائل میں رہتے ہوئے بھی لازوال عزم و حوصلے کے ساتھ اپنی ٹیم سے بہتر نتائج برآمد کرنے کے تگ و دو میں لگے ہیں۔ انکی ہمت اور کوشش بہتر ین نتائج سامنے لارہی ہے۔ امید کی جارہی ہے کہ بہت جلد بلدیہ وسطی کوڑے کا بیک لاگ بھی کم ترین کی سطح پر لانے میں کامیاب ہو جائے گی۔ 

3rd Jan 2017 DMC Central Karachi News & Picture Meeting UC Chairman

2nd Jan 2017 DMC Central Karachi News & Picture

بلدیہ وسطی میں پانچ روزہ پھولوں کی نمائش پوری آب وتاب سے جاری 

ہرطبقۂ فکر اور شعبہ سے تعلق رکھنے والوں کی خواتین و بچوں سمیت جوق در جوق شرکت

دو دنوں کے دوران آٹھ ہزار سے زیادہ افراد کی شرکت، پھولوں کے ساتھ سلیفی کی بہار

مورخہ : 2؍جنوری 2017ء ؁ 

کراچی ( ) چیئرمین بلدیہ وسطی ریحان ہاشمی کی ہدایت پر فتح پارک بلاک ایف نارتھ ناظم آباد میں یکم جنوری کو شروع ہونے والی گلِ داؤدی کی نمائش اپنے پورے آب و تاب سے جاری ہے۔ریحان ہاشمی نے محکمۂ باغات کو ہدایت کی ہے کہ نمائش کے دنوں میں عوام کو کسی قسم کی تکلیف کا سامنا نہ کرناپڑے۔ محکمہء باغات کے کارکنان عوام کی رہنمائی کے لئے رات دیرتک موجود ہیں۔ اہلِ علاقہ اپنے اہلِ خانہ ، خواتین اور بچوں کے ہمراہ سینکڑوں کی تعداد میں جوق در جوق نمائش دیکھنے آرہے ہیں۔نمائش کی خاص بات یہ ہے کہ ہر طبقۂ فکر اور شعبے سے تعلق رکھنے والے افراد قلمکار، صنعتکار، طلباو طالبات، گھریلوخواتین ، اساتذہ اور فنکار بھی گلِ داؤدی کی نمائش میں دل چسپی لے رہے ہیں۔دودنوں میں تقریباً آٹھ ہزار افراد نے اپنے اہلِ خانہ کے ہمراہ نمائش سے استفادہ کیا۔ ہر عمر کے خواتین و حضرات گلِ داؤدی کے ہمراہ سیلفی بنواتے رہے ۔ اُدھر فتح پارک میں نمائش کے ساتھ ساتھ میلے کا بھی اہتمام کیاگیاہے جہاں بچوں بڑوں ، خواتین و حضرات کی دلچسپی کے مواقع موجود ہیں۔ جبکہ فوڈاسٹریٹ کی طرز پر کھانے کے اسٹالز بھی لگے ہیں جہاں مزے مزے کے کھانے نمائش میں شرکاء کے
منتظر ہیں۔ نمائش 5؍جنوری 2017ء ؁ تک جاری رہے گی۔ 

2nd Jan 2017 DMC Central Karachi News & Picture

1st Jan 2017 DMC Central Karachi News & Picture

حکومتِ سندھ اختیارات دے تو کراچی کو پھر روشنیوں کا مثالی شہر بنادیں : وسیم اختر 

آٹھ سال کے جمع شدہ کچرے کا پچاس فیصد صاف کیا جاچُکا ہے: ریحان ہاشمی 

بلدیہ وسطی میں پانچ روزہ گلِ داؤدی کی نمائش کے موقع پر حاضرین سے خطاب 

مورخہ: یکم؍ جنوری 2017ء ؁ 

کراچی ( ) میئرکراچی وسیم اختر نے کہا ہے کہ اگر حکومتِ سندھ شہری حکومت کو قرارِ واقعی اختیارات دے تو اس شہر کو ایک مرتبہ پھر روشنیوں اور مثبت سرگرمیوں کامثالی شہر بنادیں، وہ بلدیہ وسطی کراچی میں چیئرمین ریحان ہاشمی کے ہمراہ نئے سال کے پہلے دِن گُلِ داؤدی کی پانچ روزہ نمائش کا افتتاح کرنے کے بعد حاضرین سے خطاب کررہے تھے۔ انہوں نے مزید کہا کہ کراچی کے بیشتر بلدیاتی مسائل کا سبب کراچی واٹر اینڈ سیوریج بورڈ کی ناقص کارکردگی ہے ۔ جو حکومتِ سندھ کے ماتحت کام کررہا ہے حالانکہ اُسے شہری حکومت کے ماتحت ہونا چاہیے۔ وسیم اختر نے میڈیا کے سوال کے جواب میں کہا کہ سارے اختیارات اور وسائل تو صوبائی حکومت کے پاس ہیں جس کی وجہ سے شہری حکومت کو قدم قدم پر پریشانیوں کا سامنا ہے ۔ 100روزہ صفائی مہم کے حوالے سے انہوں نے کہ تیس روز میں بہتر کچھ کیا جاچُکا ہے جس کے بہتر نتائج نظر آرہے ہیں ۔انہوں نے عوام سے بھی اپیل کی کہ وہ اپنے علاقوں کوصاف ستھرا رکھنے میں بلدیاتی اداروں کے ساتھ تعاون کریں او ر کچرے کو تھیلوں میں بھر کر کچرا کنڈی کے مقامات پر رکھیں تاکہ انہیں بہ آسانی اُٹھایا جاسکے۔ قبل ازیں چیئرمین بلدیہ وسطی ریحان ہاشمی نے اپنے استقبالیہ خطاب میں کہا کہ بلدیاتی اداروں پر آٹھ سالہ بندش کے بعد جب عوام کے منتخب نمائندوں نے اپنے عہدوں کو سنبھالا تو نظام بہت بگڑ چُکا تھا جسے ٹھیک کرنے میں وقت لگے گا تاہم ایمانداری، خلوصِ نیت اور دن رات محنت کرکے اسے بہتر کیا جارہاہے۔ انہوں نے مزید بتایا کہ 100روزہ صفائی مہم کے پہلے 30دِنوں میں گذشتہ آٹھ سال کے جمع شدہ کچرے کا پچاس فیصد اُٹھایا جاچُکا ہے ۔ صفائی مہم کے سلسلے میں منتخب یوسیز میں نتائج سامنے آرہے ہیں۔ گلِ داؤدی کی نمائش کو انہوں نے عوام کے لئے بہتر ماحول فراہم کرنے اور تفریح کے مواقع فراہم کرنے کی جانب ایک اور قدم قراردیتے ہوئے کہا کہ بلدیہ وسطی عوام کو بہتر شہری ماحول مہیا کرنے کے لئے اور بہت سے پروگرام مرتّب کرنا چاہتی ہے تاکہ کراچی میں ایک مرتبہ پھر رونقیں بحال ہوجائیں۔ اس موقع پر میونسپل کمشنر محمد وسیم سومرو ، یونین کمیٹی 21 کے چیئرمین نعیم الدین ،منتخب بلدیاتی نمائندے ،بلدیاتی افسران اور عوام کی بڑی تعداد موجود تھی ۔ بیس کمانڈر پی اے ایف بیس ملیر،ایئر کموڈور شہزادہ شاہجہاں(تمغہء امتیاز ) نے تقریب میں خصوصی شرکت کی اور نمائش کو کراچی کے شہریوں کے لئے خوش آئند قرار دیا۔فتح پارک بلاک ایف نارتھ ناظم آباد میں منعقدہ گلِ داؤدی کی اس پانچ روزہ نمائش کا اہتمام بلدیہ وسطی کے محکمہء باغات نے کیا ہے ، جس کے روحِ رواں ڈائریکٹر باغات ندیم حنیف ہیں۔ نمائش میں 100سے زیادہ رنگوں کے پھول اور 10,000سے زیادہ پودے نمائش کے لئے رکھے گئے ہیں۔ شہریوں کی بڑی تعداد نمائش کواپنے اہلِ خانہ کے ساتھ دیکھنے آرہی ہے۔

1st Jan 2017 DMC Central Karachi News & Picture

30th Dec 2016 DMC Central Karachi News & Picture

بلدیہ وسطی میں نئے سال کا استقبال پھولوں کی نمائش سے ہوگا

فتح پارک ، نارتھ ناظم آباد میں پھولوں کی نمائش کا افتتاح میئر کراچی وسیم اختر کریں گے

بلدیہ وسطی محکمہ باغات کی نرسری میں تیارکردہ بے شمار گلِ داؤدی کی اقسام عوام کا استقبال کریں گی 

مورخہ: 30؍ دسمبر 2016ء ؁

کراچی ( ) بلدیہ وسطی میں نئے سال کا استقبال پھولوں کی نمائش سے کیا جائے گا۔چیئرمین ریحان ہاشمی کی ہدایت پرفتح پارک نارتھ ناظم آباد میں منعقد ہونے والی پھولوں کی نمائش میں بلدیہ وسطی کے محکمۂ باغات میں تیار کردہ گُلِ داؤدی کی بے شمار اقسام عوام کے استقبال کے لئے چشم براہ ہونگی۔نمائش کا افتتاح یکم جنوری کو میئر کراچی وسیم اختر کریں گے ۔ریحان ہاشمی نے نمائش کے حوالے سے کہا ہے کہ بلدیہ وسطی کی انتظامیہ اور کارکنان نامساعد حالات کے باوجود عوام کو بہتر ماحول اور تفریح کے مواقع مہیاکرنے کے لئے ہرممکن کوشش کر رہے ہیں۔ انہوں نے پھولوں کی نمائش کو 100روزہ صفائی مہم کا تسلسل قراردیا۔ تفصیلات کے مطابق بلدیہ وسطی میں ہر سال کی طرح امسال بھی موسمِ سرما میں گُلِ داؤدی کی نمائش پورے اہتمام سے کی جارہی ہے۔ اس نمائش کے لئے بلدیہ وسطی کے محکمہۂ باغات نے خصوصی طور پر گُلِ داؤدی کے بے شمار اقسام کے پودے اپنی نرسری میں تیار کئے ہیں ، جنہیں خوبصورتی کے ساتھ فتح پارک نارتھ ناظم آباد میں آراستہ کیا گیاہے۔ چیئرمین بلدیہ وسطی نے عوام سے اپیل کی ہے کہ اس نمائش میں زیادہ سے زیادہ شرکت کرکے ثابت کردیں کی کراچی کے عوام نامساعد حالات میں بھی زندگی میں مسرت اور شادمانی کے مواقع نکال لیتے ہیں۔اُمید ہے کہ عوام بڑی تعدادمیں پھولوں کی نمائش میں شرکت کریں گے۔ 

30th Dec 2016 DMC Central Karachi News & Picture